Gəncə avtomobil zavodu (GAZ) Minsk traktor zavodu ilə birgə müəssisə yaratmaq üzrə iş aparır. Bu barədə Belarusun Azərbaycandakı səfiri Nikolay Patskeviç çərşənbə axşamı  GAZ-da olarkən bildirib. «İnterfaks-Azərbaycan» agentliyinin regional müxbirinin məlumatına görə, səfir qeyd edib ki, birgə istehsal ediləcək traktorların yığılacağı meydançada yenidənqurma işləri aparılır. Traktorların üçüncü ölkəyə satışı planlaşdırılır. «Ötən il zavodda 426 traktor yığılıb. Bu il onların sayının 1000-ə çatdırılacağına ümid edirik. Onlardan 500-ü dövlət sifarişilə yığılacaq. Zavodda iş belə templə gedərsə, istifadəyə veriləcək traktorların sayı ildə 1 mindən 8 minədək artırılacaq»,-deyə N.Patskeviç vurğulayıb.
Belarus səfirliyi nümayəndə heyətinin tərkibində işgüzar səfərə gələn Belarus parlamentinin beynəlxalq məsələlər üzrə komissiyasının sədr müavini Anatoli Karasutski qeyd edib ki, iki ölkə arasında əmtəə dövriyyəsi 3 dəfə artıb və 2007-ci ilin yekunlarına əsasən  $60 mln.-dan çoxdur. «Perspektivdə  $100 mln.-a, daha bir neçə ildən sonra isə  $500 mln.-a çatmaq qarşıya vəzifə qoyulub. Zənnimcə, bu, bizim ölkələrin iqtisadiyyatı arasında tam real vəzifədir. Ancaq onu da qeyd etmək vacibdir ki, bizim münasibətlər təkcə iqtisadi planda yox, həm də mədəni sahədə inkişaf edir. Bu əməkdaşlığın bazasını dövlət başçılarımız arasında olan dost münasibətləri təşkil edir»,-deyə deputat vurğulayıb.
Birgə müəssisədə yığılacaq traktorlar Türkmənistan, Özbəkistan, Qazaxıstan, Gürcüstan və Rusiyaya satılacaq.
Əvvəllər «Oka», «Kamaz», UAZ avtomobillərinin yığılması ilə məşğul olan GAZ hazırda Minsk traktor zavodu ilə birgə əsasən yük avtomobilləri və 6 modifikasiyalı traktorların yığılmasını həyata keçirir.